海上花列传

第十八回 添夹袄厚谊即深情 补双台阜财能解愠

　　按：陶玉甫听得李漱芳咳嗽，慌忙至大床前揭起帐子，要看漱芳面色。漱芳回过头来眱了玉甫半日，叹一口气。玉甫连问："阿有啥勿适意？"漱芳也不答，却说道："耐个人也好个哉！我说仔几转，教耐昨日转来仔末就来，耐定归勿依我。随便啥闲话，搭耐说仔耐只当耳边风！"玉甫急分辨道："勿是呀；昨日转来末晚哉，屋里有亲眷来浪，难末阿哥说：'阿有啥要紧事体，要连夜赶出城去？'我阿好说啥 ？"漱芳鼻子里哼的一声，说道："耐覅来搭我瞎说！我也晓得点耐脾气。要说耐外头再有啥人来浪，故也冤枉仔耐哉。耐总不过一去仔末就想勿着，等耐去死也罢活也罢，总勿关耐事，阿对？"玉甫陪笑道："就算我想勿着，不过昨日一夜天，今朝阿是想着仔来哉。"漱芳道："耐是勿差，一 困下去，困到仔天亮末，一夜天就过哉。耐阿晓得困勿着了，坐来浪，一夜天比仔一年还要长点哩！"玉甫道："总是我勿好，害仔耐。耐覅动气。"漱芳又嗽了几声，慢慢的说道："昨日夜头天末也讨气得来，落勿停个雨。浣芳 出局去哉，阿招末搭无娒装烟，单剩仔大阿金坐来浪打磕铳。我教俚收拾好仔去困罢，大阿金去仔，我一干仔就榻床浪坐歇，落得个雨来加二大哉，一阵一阵风吹来哚玻璃窗浪，乒乒乓乓，像有人来哚碰。连窗帘才卷起来，直卷到面孔浪。故一吓末，吓得我来要死！难末只好去困。到仔床浪 ，陆里困得着嗄，间壁人家刚刚来哚摆酒，豁拳，唱曲子，闹得来头脑子也痛哉！等俚哚散仔台面末，台子浪一只自鸣钟，跌笃跌笃，我覅去听俚，俚定归钻来里耳朵管里。再起来听听雨末，落得价高兴，望望天末，永远勿肯亮个哉。一径到两点半钟，眼睛算闭一闭。坎坎闭仔眼睛，倒说道耐来哉呀，一肩轿子抬到仔客堂里。看见耐轿子里出来，倒理也勿理我，一径望外头跑，我连忙喊末，自家倒喊醒哉。醒转来听听，客堂里真个有轿子，钉鞋脚地板浪声音，有好几个人来浪。我连忙爬起来，衣裳也勿着，开出门去，问俚哚：'二少爷啥？'相帮哚说：'陆里有啥二少爷嗄。'我说：'价末轿子陆里来个嗄？'俚哚说：'是浣芳出局转来个轿子。'倒拨俚哚好笑，说我困昏哉。我再要困歇，也无拨我困哉，一径到天亮，咳嗽勿曾停歇。"玉甫攒眉道："耐啥实概嗄！耐自家也保重点个 。昨日夜头风末来得价大，半夜三更勿着衣裳起来，再要开出门去，阿冷嗄？耐自家勿晓得保重，我就日日来里看牢仔耐也无么用啘。"漱芳笑道："耐肯日日来里看牢仔我，耐也只好说说罢哉。我自家晓得命里无福气，我也勿想啥别样，再要耐陪我三年，耐依仔我，到仔三年我就死末我也蛮快活哉。倘忙我勿死，耐就再去讨别人，我也勿来管耐哉。就不过三年，耐也勿肯依我，倒说道日日来里看牢仔我！"玉甫道："耐说说末就说出勿好来哉。耐单有一个无娒离勿开，再三四年等耐兄弟做仔亲，让俚哚去当家，耐搭无娒到我屋里向去，故末真个日日看牢仔耐，耐末也称心哉。"漱芳又笑道："耐是生来一径蛮称心，我陆里有故号福气！我不过来里想，耐今年廿四岁，再歇三年也不过廿七岁。耐廿七岁讨一个转去，成双到老，要几十年哚。该个三年里向就算我冤屈仔耐也该应啘。"玉甫也笑道："耐瞎说个多花啥，讨转去成双到老末就是耐啘。"漱芳乃不言语了。只见李浣芳蓬着头，从后门进房，一面将手揉眼睛，一面见玉甫，说道："姐夫，耐昨日啥勿来嗄？"玉甫笑嘻嘻拉了浣芳的手过来，斜靠着梳妆台而立。漱芳见浣芳只穿一件银红湖绉捆身子，遂说道："耐啥衣裳也勿着嗄？"浣芳道："今朝天热呀。"漱芳道："陆里热嗄，快点去着仔 ！"浣芳道："我覅着，热煞来里！"正说着，阿招已提了一件玫瑰紫夹袄来，向浣芳道："无娒也来哚说哉，快点着罢。"浣芳还不肯穿。玉甫一手接那夹袄替浣芳披在身上道："耐故歇就着仔，晚歇热末再脱末哉，阿好？"浣芳不得已依了。阿招又去舀进脸水请浣芳捕面梳头，漱芳也要起身。玉甫忙道："耐再困歇 ，天早来里。"漱芳说："我覅困哉。"玉甫只得去扶起来，坐在床上，复劝道："耐就床浪坐歇，倪说说闲话倒无啥。"漱芳仍说："覅！"及至漱芳下床，终觉得鼻塞声重，头眩脚软，惟咳嗽倒好些。漱芳一路扶着桌椅，步至榻床坐下，玉甫跟过来放下一面窗帘。大阿金送上燕窝汤，漱芳只呷两口，即叫给浣芳吃了。浣芳新妆既罢，漱芳方去捕起面来。阿招道："头还蛮好来里，覅梳哉。"漱芳也觉坐不住，就点点头。大阿金用抿子蘸刨花水略刷几刷，漱芳又自去刷出两边鬓脚，已是吃力极了，遂去歪在榻床上喘气。玉甫见漱芳如此，心中虽甚焦急，却故作笑嘻嘻面孔。单有浣芳立在玉甫膝前，呆呆的只向漱芳呆看。漱芳问他："看啥？"浣芳说不出，也自笑了。大阿金正在收拾镜台，笑道："俚末看见阿姐勿适意仔也勿起劲哉，阿晓得？"浣芳接说道："昨日蛮好来里，才是姐夫勿好啘，倪勿来个！"说着便一头撞在玉甫怀里不依。玉甫忙笑道："俚哚骗耐呀。无啥勿适意，晚歇就好哉。"浣芳道："晚歇再勿好末，要耐赔还个好阿姐拨倪。"玉甫道："晓得哉，晚歇我定归拨耐个好阿姐末哉。"浣芳听说方罢。漱芳歪在榻床上，渐渐沉下眼睛，像要睡去。玉甫道："原到床浪去困罢。"漱芳摇摇手。玉甫向藤椅子上揭条绒毯，替漱芳盖在身上，漱芳憎道："重！"仍即揭去。玉甫没法，只去放下那一面窗帘，还恐漱芳睡熟着寒，要想些闲话来说，于是将乡下上坟许多景致，略加装点，演说起来。浣芳听得津津有味，漱芳却憎道："拨耐说得烦煞哉，我覅听！"玉甫道："价末耐覅困 。"漱芳道："我勿困着末哉，耐放心。"玉甫乃在榻床一边盘膝危坐，静静的留心看守。但害得个浣芳坐不定立不定，没处着落。漱芳叫他外头去白相歇，浣芳又不肯去。

　　一会儿，大阿金搬中饭进房。玉甫问漱芳："阿吃得落？吃得落末吃仔口罢。"漱芳说："覅吃。"浣芳见漱芳饭都不吃，只道有甚大病，登时发极，涨得满面绯红，几乎吊下眼泪。倒引得漱芳一笑，说浣芳道："耐啥实概嗄，我还勿曾死哩。故歇吃漱落末，晚歇吃。"浣芳自知性急了些，连忙极力忍住。玉甫因浣芳着急，也苦苦的劝漱芳多少吃点。漱芳只得令大阿金买些稀饭，吃了半碗。浣芳也吃不下，只吃一碗。玉甫本自有限。大家吃毕中饭，收拾洗脸。玉甫思将浣芳支使开去，恰好阿招来报说："无娒起来哉。"浣芳犹自俄延。玉甫催道："快点去罢，无娒要说哉。"浣芳始讪讪的趔趄而去。

　　浣芳去后，只有玉甫、漱芳两人在房里，并无一点声息。不料至四点多钟，玉甫的亲兄陶云甫乘轿来寻。玉甫请进房里，相见就坐。云甫问漱芳："阿是勿适意？"漱芳说："是呀。"大阿金忙着预备茶碗，云甫阻止道："我说句闲话就去，覅泡茶哉。"乃向玉甫道："三月初三是黎篆鸿生日，朱蔼人分个传单，包仔大观园一日戏酒。篆鸿末常恐惊动官场，勿肯来，难末蔼人另合一个公局，来哚屠明珠搭。勿多几个人，倪两家头也来海。我为此先搭耐说一声，到仔初三日脚浪，大观园里也勿必去哉，屠明珠搭定归要到个。"玉甫虽诺诺连声，却偷眼去看漱芳。偏被云甫觉得，笑问漱芳道："耐阿肯放俚去应酬歇？"漱芳不好意思，笑答道："大少爷倒说得诧异。故是正经事体，总要去个，倪阿有啥勿放俚去嗄？"云甫点头道："故末勿差。我说漱芳也是懂道理个人，要是正经事体也拉牢仔勿许去，阿算得啥要好嗄？"漱芳不好接说，含笑而已。云甫随说："我去哉。"玉甫慌忙直站起来，漱芳送至帘下。

　　云甫踅出门外上轿，吩咐轿班："朱公馆去。"轿班俱系稔熟，抬出东兴里，往东进中和里。相近朱公馆，朱蔼人管家张寿早已望见，忙跑至轿前禀说："倪老爷来哚尚仁里林家。"云甫便令转轿，仍由四马路径至尚仁里林素芬家。认得朱蔼人的轿子还停在门首，陶云甫遂下轿进门。到了楼上房里，朱蔼人迎着，即道："正要来请耐。我一干仔来勿及哉，屠明珠搭耐去办仔罢。"陶云甫问如何办法。朱蔼人向身边取出一篇草帐道："倪末两家弟兄搭李实夫叔侄，六个人作东，请于老德来陪客。中饭吃大菜，夜饭满汉全席。三班毛儿戏末，日里十一点钟一班，夜头两班，五点钟做起。耐说阿好？"陶云甫道："蛮好。"林素芬等计议已定，方上前敬瓜子。陶云甫收了草帐，也就起身说："我还有点事体，再见罢。"朱蔼人并不挽留，与林素芬送至楼梯边而别。素芬回房，问蔼人："啥事体？"蔼人细细说明缘故。素芬遂说道："耐请客末勿到该搭来，也去拍屠明珠个马屁，阿要讨气。"蔼人道："勿是我请客，倪六个人公局。"素芬道："前日仔倒勿是耐请客？"蔼人没得说，笑了。素芬复道："倪该搭是小场花，请大人到该搭来，生来勿配。耐也一径冤屈煞哉，难末拣着个大场花，要适意点哚。"蔼人笑道："难末真真倒诧异哉。我阿曾去做屠明珠，耐啥就吃醋嗄？"素芬道："耐要做屠明珠去做末哉啘，我也勿曾拉牢仔耐。"蔼人笑道："我就勿说哉，随便耐去说啥罢。"素芬鼻子里哼了一声，咕噜道："耐末去拍屠明珠个马屁，屠明珠阿来搭耐要好嗄。"蔼人笑道："啥人要俚来要好？"素芬仍咕噜道："耐就摆仔十个双台，屠明珠也无啥希奇，搭耐要好末倒勿见好，情愿去做铲头客人，上海滩浪也单有耐一个。"蔼人笑道："耐覅动气，明朝夜头我也来摆个双台末哉。"素芬呆着脸，也不答言。蔼人过去搀了素芬的手，至榻床前，央及道："搭我装筒烟 。"素芬道："倪是毛手毛脚，勿比得屠明珠会装 ！"口中虽如此说，却已横躺着拿签子烧起烟来。蔼人挨在膝前坐了，又伏下身子向素芬耳朵边低声说道："耐一径搭我蛮要好，故歇为仔个屠明珠，啥气得来？耐看我阿要去做屠明珠？"素芬道："耐是倒也说勿定。"蔼人道："我再去做别人，故末说勿定，要说是屠明珠，就算俚搭我要好末，我也勿高兴去做俚。"素芬道："耐去做勿做关倪啥事体，耐也覅来搭我说。"蔼人乃一笑而罢。素芬装好一口烟，放下烟枪，起身走开。蔼人自去吸了，知道素芬还有些芥蒂，遂又自去开了抽屉，寻着笔砚票头随意点几色菜水。素芬看见，装做不理，等蔼人写毕，方道："耐点菜末，阿要先点两样来吃夜饭？"蔼人忙应说："好。"另开两个小碗，素芬叫娘姨拿下楼去令外场叫菜。正是上灯时候，菜已送来，自己又添上四只荤碟，于是蔼人与素芬对酌闲谈。一时复说起屠明珠来，素芬道："做倌人也只做得个时髦，来哚时髦个辰光，自有多花客人去烘起来。客人末真真叫讨气，一样一千洋钱，用拨来生意清点个倌人，阿要好？用拨仔时髦倌人，俚哚觉也勿觉着。价末客人哚定归要去做时髦倌人，情愿豁脱仔洋钱去拍俚马尼。"蔼人道："耐覅说客人讨气，倌人也讨气。生意清仔末，随便啥客人巴结得非凡哚，稍微生意好仔点，难末姘戏子、做恩客才上个哉，到后来弄得一场无结果。"素芬道："姘戏子多花到底少个，故也覅去说俚哉，我看几个时髦倌人也无啥好结果，耐来里时髦辰光，拣个靠得住点客人嫁仔末好哉啘，俚哚才勿想嫁人，等到年纪大仔点，生意一清仔末，也好哉。"蔼人道："倌人嫁人也难，要嫁人陆里一个勿想嫁个好客人？碰着仔好客人，俚屋里大小老婆倒有好几个来浪，就嫁得去，总也勿称心个哉。要是无拨啥大小老婆末，客人靠勿住，拿耐衣裳、头面才当光仔，再出来做倌人。夷场浪常有该号事体。"素芬道："我说要搭客人脾气对末好，脾气对仔，就穷点，只要有口饭吃吃好哉。要是差仿勿多客人，故末宁可拣个有铜钱点总好点。"蔼人笑道："耐要拣个有铜钱点，像倪是挨勿着个哉。"素芬也笑道："噢唷！客气得来！耐算无铜钱，耐来里骗啥人嗄？"蔼人笑道："我就有仔铜钱，脾气勿对，耐也看勿中啘。"素芬道："耐说说末就说勿连牵哉。"随取酒壶给蔼人筛酒。蔼人道："酒有哉，倪吃饭罢。"素芬遂喊娘姨拿饭来，并令叫妹子翠芬来同吃。娘姨回说："翠芬吃过哉。"蔼人、素芬两人刚吃毕饭，即有一帮打茶会客人上楼，坐在对过空房间里，随后复有叫素芬的局票。蔼人趁势要走，素芬知留不住，送至房门。蔼人下楼登轿，径回公馆。次日晚间，免不得请一班好友在林素芬家摆个双台，不必细说。

　　至三月初三，十点钟时，朱蔼人起来，即乘轿往大观园。只见门前挂灯结彩，张寿带着纬帽迎见，禀说："陈老爷、洪老爷、汤老爷才来里哉。"蔼人进去厮见，动问诸事，皆已齐备。蔼人大喜，乃说道："价末我到该首去哉。此地奉托三位。"陈小云、洪善卿、汤啸庵都说："应得效劳。"当时蔼人复乘轿往鼎丰里屠明珠家。

　　第十八回终。